Տարիքին զուգահեռ ուղեղի աշխատանքն սկսում է մարել, ինչն անդրադառնում է հիշողության և մտածողության արագության վրա։ Այդ գործընթացները դանդաղում են, եթե պահպանվում է ֆիզիկական ակտիվությունը։

Հետազոտությունները ցույց են տալիս, որ կարդիոռեսպիրատոր (շնչառական և սրտանոթային) համակարգի առողջությունը տարիքով մարդկանց դեպքում պայմանավորված է ուղեղի կատարողական գործառույթների իրականացմամբ։ Դրանք են ուղեղի՝ նպատակաուղղված, կամային գործունեության ընդունակությունը, ինչը կարևոր է սթափ դատողություններ անելու և տարատեսակ խնդիրներ լուծելու համար։

Պարզելու համար, թե կոնկրետ ինչպես է ֆիզիկական ակտիվությունն ազդում ուղեղի աշխատանքի վրա, գիտնականների խումբը (գլխավորել է Բեկմանովի տեխնոլոգիայի և ժամանակակից գիտության ինստիտուտի տնօրեն, Իլինոյսի համալսարանում հոգեբանության և նյարդագիտության պրոֆեսոր Արտ Կրամերը) հետազոտել է 59-80 տարեկան 128 մարդու։

Հետազոտվողների ուղեղն ուսումնասիրել են մագնիսառեզոնանսային տոմոգրաֆիայի օգնությամբ։ Պարվել է, որ որոշակի հատվածներ ուժգին ակտիվանում են, երբ մարդը կատարում է միաժամանակ երկու առաջադրանք։ Միաժամանակ երկու գործ անելը հետաքրքրել է գիտնականներին, քանի որ այն թույլ է տալիս գնահատել ուղեղի իմացական գործառույթները, որոնք կարևոր դեր են խաղում տարատեսակ ճանաչողական գործընթացներում։ Հայտնի է, որ ծերացման գործընթացում իմացական ֆունկցիաները թուլանում են։

Գիտնականները հայտնաբերել են, որ կարդիոռեսպիրատոր համակարգի առողջությունը դրականորեն է ազդում ծեր տարիքում իմացական ֆունկցիաների պահպանման վրա, ինչն արտացոլվում է ինչպես վարքում, այնպես էլ ուղեղի համապատասխան հատվածների ակտիվության մակարդակում։

Հետազոտության հեղինակները պարզել են, որ կարդիոռեսպիրատոր համակարգի և իմացական գործընթացների կապը մասամբ բացատրվում է ուղեղի այն հատվածների ակտիվությամբ, որ կոչվում են առաջային գոտևոր կեղև և մոտորային հատված։ Այդ արդյունքները ցույց են տալիս, որ ֆիզիկական ակտիվությունը կարող է նպաստել մտավոր կարողությունների պահպանմանը ցանկացած տարիքում։