Ծաղկակաղամբը կաղամբազգիների ընտանիքի միամյա մշակաբույս է։ Կաղամբի բոլոր տեսակներից իր սննդային և համային հատկություններով գրավում է առաջին տեղը։ Հայրենիքը համարվում է Սիրիան։

Սննդի համար օգտագործվում են ծաղկակաղամբի գլուխները, որոնք իրենցից ներկայացնում են բույսի խիստ կարճացած, հաստացած, մսալի, հոծ կերպով ի մի հավաքած ծաղկակիր ցողունները։ Ծաղկակաղամբն ածխաջրերով և, մանավանդ, դյուրամարս սպիտակուցներով անհամեմատ ավելի հարուստ է, քան կաղամբը։ Բացի այդ, կաղամբից երկու անգամ ավելի շատ վիտամին C է պարունակում։

Կալորիականությունը

100 գրամ ծաղկակաղամբի կալորիականությունը 30 կկալ է։

Օգտակար հատկությունները

Ծաղկակաղամբն օգտակար է բոլորին՝ և՛ երեխաներին, և՛ մեծահասակներին։

Կանխում է օնկոլոգիական հիվանդությունների առաջացումը։

Բարձրացնում է դիմադրողականությունը։

Նպաստում է արյան մեջ խոլեստերինի մակարդակի նվազեցմանը, ամրացնում է անոթների պատերը, օգնում բուժել սրտանոթային համակարգի հիվանդությունները։

Հրաշալիորեն օգնում է բուժել ստամոքսաղիքային տրակտի հիվանդությունները։

Ցուցված է գաստրիտ և խոց ունեցող մարդկանց, քանի որ չի գրգռում ստամոքսի լորձաթաղանթը և լավ է խմորվում ու յուրացվում։

Օգտակար է փորկապության ժամանակ։

Անփոխարինելի օգնական է ավելորդ ճարպից ազատվել ցանկացող մարդկանց համար։

Ժողովրդական բժշկության մեջ ծաղկակաղամբի հյութն օգտագործում են լնդերի բորբոքումից ազատվելու համար։

Օգտակար է նաև լյարդի և լեղապարկի հիվանդությունների ժամանակ։

Նպաստում է նյարդային համակարգի աշխատանքի կարգավորմանը։

Ցուցված է շաքարային դիաբետ ունեցող մարդկանց և փոքր երեխաներին։

Հակացուցումներ

Ցավոք ծաղկակաղամբն ունի որոշ հակացուցումներ։ Խորհուրդ է տրվում չօգտագործել հոդատապի, ստամոքսի սուր հիվանդությունների և բարձր թթվայնությամբ ուղեկցվող գաստրիտի դեպքում։