Դաղձի օգտակար հատկություների մասին հայտնի է դեռևս վաղեմի ժամանակներից։ Այն առ այսօր օգտագործվում է տարաբնույթ հիվանդությունների բուժման և կանխարգելման համար ինչպես ժողովրդական, այնպես էլ պաշտոնական բժշկության մեջ։

Ըստ ավանդության՝ դաղձ (անանուխը ) Mentha է կոչվել Մենտա հավերժահարսի անունով, ում Պերսեփոնեն՝ Զևսի և Դեմետրեի դուստրը, բուսական աշխարհի թագուհին, հոտավետ բույս դարձրեց՝ բուրավետ դաղձ ու Աֆրոդիտեին ընծայեց։

Հին Հռոմում համոզված էին, որ անանուխի բույրը տրամադրություն է բարձրացնում, այդ պատճառով խնջույքի սրահները ցողում էին անանուխի ջրով, սեղանները շփում տերևներով։ Հռոմեացի գիտնական, ռազմական և պետական գործիչ Պլինիոս Ավագը գտնում էր, որ անանուխի բույրը նպաստում է ուղեղի արդյունավետ գործունեությանը, այդ պատճառով միշտ դալար ընձյուղներից հյուսված պսակ էր կրում, նույնը խորհուրդ էր տալիս աշակերտներին։

Դաղձի յուղի հիմնական բաղադրամասը ստացվում է դրա մեջ պարունակվող մենթոլից։ Մենթոլը մաշկի և լորձաթաղանթի հետ շփվելիս հրահրում է սառնության զգացողություն, դրա հետ մեկտեղ նեղանում են արտաքին արյունատար անոթները և լայնանում ներքին օրգանների անոթները։

Դաղձի յուղն օժտված է հզոր հականեխային հատկությամբ և թեթև թմրեցնող արդյունքով։ Բժշկության մեջ դաղձն օգտագործվում է լեղապարկի և լյարդի հիվանդությունների ժամանակ։

Դրանից պատրաստված թուրմերը, եփուկներն ու դեղպատրաստուկներն օգնում են որոշ լեղաքարային հիվանդությունների դեպքում, ուժեղացնում աղիների գալարակծկքանը, մաքրում օրգանիզմը խարամներից, բացի այդ, այն նշանակվում է կոլիտների և էնթերոկոլիտների դեպքում։

Օգտակար հատկությունները

Օգտակար է հարբուխի և բրոնխաթոքային հիվանդությունների բուժման համար, օժտված է քրտնաբեր հատկությամբ։

Խթանում է սրտանոթային համակարգի աշխատանքին, ունի անոթալայնիչ հատկություն, օգնում է մեղմել սրտի ցավն ու սպազմը, հանգստացնում է սրտխփոցը։

Բարենպաստ ազդեցություն է թողնում գլխուղեղի աշխատանքի վրա։

Հրաշալի միջոց է մարսողական համակարգի հիվանդությունների բուժման հարցում, ցավազրկում է, օգնում թեթևացնել բորբոքումը, անցկացնում է սրտխառնոցը, ունի լեղամուղ հատկություն, լավացնում է մարսողությունը։

Հանգստացնում է նյարդային համակարգը, լավացնում է քունը։

Թարմ տերևներից պատրաստված կոմպրեսներն օգտագործվում են ռևմատիզմի, արթրիտի և հոդատապի ժամանակ առաջացող հոդացավի դեմ։

Անանուխը մանրէազերծում է բերանի խոռոչը և ազատում բորբոքումից, թարմացնում է շնչառությունը։

Լայնորեն կիրառվում է կոսմետոլոգիայում։

Մաքրում է, վերականգնում վնասված մաշկը, օգնում ազատել այն գրգռվածությունից և քորից։

Հակացուցումները

Հակացուցված է մինչև երեք տարեկան երեխաներին։ Չի կարելի չարաշահել այն երակների վարիկոզ լայնացման և ցածր ճնշման դեպքում։