Այսօր՝ հոկտեմբերի 13-ին, աշխարհում առաջին անգամ նշվում է Թրոմբոզների համաշխարհային օրը (նախաձեռնությունը՝ Թրոմբոզների եւ Հեմոստազի Միջազգային ընկերակցության), որին ընդառաջ Երևանում հոկտեմբերի 11-ին մեկնարկել էր «Հեմոսթազ. խնդիրներ եւ նվաճումներ» միջազգային գիտաժողովը:

«Պրոֆ. Ռ. Օ.Յոլյանի անվան արյունաբանական կենտրոնի» տնօրեն Սմբատ Դաղբաշյանը նշել է, որ կենտրոնի և Հայկական արյունաբանական ասոցիացիայի կազմակերպված առաջին միջազգային գիտաժողովի միջոցով մեր երկիրը կմիանա «Հեմոստազի և թրոմբոզի միջազգային ընկերակցության» կողմից առաջին անգամ իրականացվող համաշխարհային ծրագրերին:

Գիտաժողովին ներկայացվել էր շուրջ 75 գիտական զեկույց ոչ միայն Հայաստանից, այլև Ռուսաստանից, Իտալիայից և Վրաստանից:

Գիտաժողովի փակման օրը՝ հոկտեմբերի 13-ին, «Tempus–Symposium» ծրագրով տեղի կունենա սատելիտային նիստ, որի շրջանակում զեկույցներով հանդես կգան եվրոպացի ճանաչված արյունաբաններ: Նրանք կներկայացնեն մակարդման ոլորտին առնչվող արդի խնդիրները: