Մի սովորական բրիտանական ընտանիքում յոթնամյա ընդմիջումով ծնվել է մաշկի տարբեր գույն ունեցող երկու զույգ աղջիկ։ Երկու զույգ երկվորյակ մեկ ընտանիքում․ երևույթն ինքնին հազվագյուտ է, իսկ որ երկու դեպքում էլ նրանց մաշկի գույնը տարբեր կլինի, հանդիպում է 2: 1.000.000 հարաբերությամբ։

Երբ Էլիսոնը և Դինը առաջին անգամ դարձան երկվորյակի ծնողներ, ապշել էին, որ Լորենի աչքերը մայրիկի աչքերի պես կապույտ են, մազերը՝ բաց գույնի, իսկ նրա քույրը՝ Հեյլին, ունի մուգ գույնի մաշկ և մազեր, ինչպես նրանց հայրը՝ Դինը, ով ծնունդով Հնդկաստանից է։ Երկրորդ հղիության ժամանակ Էլիսոնի ընկերներն ու բարեկամները կատակում էին՝ ասելով, որ կարելի է գրազ գալ՝ կկրկնվի՞ հրաշքը, թե՞ ոչ։

Այս անգամ քույրերը ժամանակից շուտ ծնվեցին, և բժիշկները մտահոգված էին նրանց առողջությամբ։ Բարեբախտաբար օրեր անց կարգավորվեց նորածինների ինքնուրույն շնչառությունը, նրանց վերջապես իրար կողքի դրեցին, և բոլորը համոզվեցին, որ այս անգամ ևս փոքրիկներն ունեն մաշկի տարբեր գույն։ 

Միան նման է հորը, իսկ Լեան՝ մորը։ Փաստորեն բնությունը երկու անգամ անսովոր նվեր է մատուցել ընտանիքին։ Գենետիկական այսպիսի եզակի երևույթը հատուկ է միայն հետերոզիգոտ՝ երկձվանի երկվորյակներին, ովքեր ձևավորվում են երկու տարբեր ձվաբջիջներից՝ բեղմնավորված երկու տարբեր սերմնաբջիջներով։ Այսպիսի երեխաներն իրենց գենոտիպով համապատասխանում են սովորական եղբորն ու քրոջը, ոչ ավել։