Երևի թե յուրաքանչյուր հղի կին իր բարեկամներից և մտերիմներից լսել է տարաբնույթ արգելքների մասին։ Յուրաքանչյուրը կարծես իր պարտքն է համարում հղի կնոջն այս կամ այն «վտանգի» մասին տեղեկացնելը։ Չի կարելի այս անել, չի կարելի այն անել․․․ Այդ խորհուրդների մեծամասնությունը, թերևս, հիմնված է նախապաշարմունքների կամ թյուր պատկերացումների վրա, սակայն կան բաներ, որոնք իսկապես վնասակար են հղիության ընթացքում։

Առաջին և ամենահայտնի փաստը՝ չի կարելի նյարդայնանալ։ Այո, քանի որ մոր հուզական վիճակը փոխանցվում է երեխային, բացի այդ ուժգին վախը կամ սթրեսը կարող են հանգեցնել վիժման կամ վաղաժամ ծննդաբերության։

Ճիշտ է նաև մազերը չներկելու խորհուրդը։ Սովորական ներկը բազմաթիվ վնասակար տարրեր է պարունակում, որոնք մաշկի միջով ներթափանցում են արյան մեջ։ Եթե մեծահասակի համար նկատելի վնաս չեն պարունակում, ապա նոր զարգացող պտղի համար կարող են անկանխատեսելի հետևանքների հանգեցնել։ Իսկ այ մազերը կտրելու վերաբերյալ պետք է իմանալ, որ վտանգավոր ոչինչ չկա:

Ապագա մայրերին չի կարելի տաք վաննա ընդունել, քանի որ 37 աստիճանից տաք ջրում լինելը կարող է հանգեցնել վաղաժամ ծննդաբերության։

Հղի կանանց արգելվում է սոլյարի գնալ․ ուլտրամանուշակագույն ճառագայթումը վնասակար է պտղի համար, իսկ մոր մաշկին կարող է անհավասար պիգմենտացիա առաջացնել։

Չի կարելի նաև ակտիվ սպորտով զբաղվել։ Հակացուցված է թենիսը, հեծանվավազքը և ծանր ատլետիկան, ավելի լավ է լողով զբաղվել և հղի կանանց համար նախատեսված վարժություններ անել։

Չի կարելի բարձրակրունկ կոշիկներ հագնել, քանի որ մեծանում է ողնաշարի և ոտքերի երակների ծանրաբեռնվածությունը։ Հղիության ընթացքում մարմնի ծանրության կենտրոնը փոխվում է, ինչի պատճառով քայլվածքն անկայուն է դառնում և բարձրակրունկ կոշիկներով մեծանում է ընկնելու հավանականությունը։

Հղիության երկրորդ կեսին չի կարելի մեջքի վրա քնել, քանի որ մեծացած արգանդը ճնշում է աղիներին և անոթներին։ Արդյունքում արյունը կարող է լճանալ ոտքերի երակներում և վարիկոզ լայնացում առաջացնել։

Վիժման վտանգի և ուշ ժամկետների դեպքում արգելվում է նաև ինքնաթիռով թռիչքը, քանի որ ճնշման անկումը կարող է վաղաժամ ծննդաբերություն առաջացնել։

Պտղի վրա վնասակար ազդեցություն են թողնում ալկոհոլը, ծխախոտն ու թմրանյութերը՝ արգելակելով երեխայի զարգացումը: