Պրենատալ սկրինինգը կենսաքիմիական և ուլտրաձայնային համակցված հետազոտություն է՝ կազմված հղիության հիմնական հորմոնների մակարդակի որոշմանն ուղղված արյան հետազոտությունից և պտղի ՈւՁՀ-ից։

Հղիության ընթացքում ստանդարտ հետազոտություն է համարվում միայն պլանային ՈւՁՀ-ն, սկրինինգը սովորաբար անցկացվում է կամ հղի կնոջ ցանկությամբ, որն ուզում է լիովին վստահ լինել երեխայի ճիշտ զարգացման հարցում, կամ էլ բժշկի նշանակմամբ, երբ կա պտղի քրոմոսոմային պաթոլոգիայի առաջացման վտանգ։

Ռիսկային խմբում են այն հղի կանայք, որոնք՝

• 35-ն անց են և (կամ) երեխայի կենսաբանական հայրը 40-ն անց է, 
• ազգում ունեցել են պտղի զարգացման ժառանգական անոմալիա, 
• նախկինում ունեցել է չզարգացող հղիություն, ինքնաբեր վիժումներ, մեռելածնություն, 
• պտղի համար վտանգավոր դեղամիջոցներ է օգտագործում։

Առաջին սկրինինգ կամ «կրկնակի թեստ» (11-14-րդ շաբաթ)

Սկրինինգը կատարվում է երկու փուլով՝ ՈւՁՀ և արյան նմուշառում։ ՈւՁՀ-ի ընթացքում ախտորոշող բժիշկը պարզում է պտուղների քանակը, հղիության ժամկետը և որոշում է սաղմի չափսերը։ Ըստ այդ տվյալների հնարավոր է ասել արդյոք երեխայի ներարգանդային զարգացումը բնականո՞ն է ընթանում, թե՞ ոչ։

Սաղմի չափսերի և կառուցվածքի գնահատում։ Պոչուկ-գագաթային չափսը սաղմի զարգացման ցուցիչներից մեկն է, որի մեծությունը համապատասխանում է հղիության ժամկետին։ Պոչուկ-գագաթային չափսը պոչուկից մինչև գագաթ ընկած հատվածի երկարությունն է՝ առանց հաշվի առնելու ոտքերի երկարությունը։

 

Աղյուսակ 1. Պոչուկ-գագաթային չափսի նորման ըստ հղիության ժամկետի

Պտղի չափսերի մեծությունը վկայում է երեխայի արագ աճի մասին և հետագայում խոշոր պտղի լույս աշխարհ գալու նախանշաններից է։ Փոքր չափսը վկայում է՝

• հղիության ժամկետի ի սկզբանե սխալ որոշման մասին, 
• զարգացման հապաղման մասին (մոր հորմոնային անբավարարության, ինֆեկցիոն հիվանդության և այլ հիվանդությունների պատճառով), 
• պտղի զարգացման գենետիկ հիվանդության մասին, 
• պտղի ներարգանդային մահվան մասին։ 

Պտղի գլխի բիպարիետալ չափսը փոքրիկի գլխուղեղի զարգացման ցուցիչն է, չափվում է քունքից մինչև քունք հատվածը։ Այդ ցուցիչը նույնպես մեծանում է հղիության ժամկետին համապատասխան։

 

Աղյուսակ 2. Պտղի գլխի բիպարիետալ չափսի նորման ըստ հղիության ժամկետի

Պտղի գլխի բիպարիետալ մեծ չափսը վկայում է՝

• պտղի խոշորության մասին, եթե մնացյալ ցուցիչները նույնպես մեծ են, 
• սաղմի թռիչքաձև աճի մասին, եթե մնացյալ ցուցիչները բնականի սահմաններում են, 
• գլխուղեղի ուռուցքի կամ ուղեղային ճողվածքի մասին (կյանքի հետ անհամատեղելի պաթոլոգիաներ), 
• գլխուղեղի հիդրոցեֆալիայի մասին։ 

Պտղի գլխի բիպարիետալ փոքր չափս է դիտվում գլխուղեղի թերզարգացածության կամ որոշ բաժինների բացակայության դեպքում։

Կարդացեք՝  Առաջին սկրինինգը հղիության ընթացքում․ մաս II

Կարդացեք՝  Առաջին սկրինինգը հղիության ընթացքում․ մաս III