Բրինզա տեսակի պանիրը, որը հեշտությամբ հնարավոր է գտնել նաև Երևանյան խանութներում, պատրաստվում է ոչ միայն կովի, այլև այծի, ոչխարի, գոմեշի կաթից, երբեմն էլ՝ դրանց խառնուրդից։

Ի տարբերություն պանիրների այլ տեսակների՝ այն չունի կոշտ կեղև և բնորոշ անցքեր։ Համասեռ զանգված է հիշեցնում, աղի է։ Յուղայնությունն այդ պանրի օգտակարության և համի ցուցիչն է․ պետք է լինի նվազագույնը 40%, իսկ ամենաօգտակարն ու ամենահամեղը 50% յուղայնությամբ բրինզան է։

Խորհուրդ է տրվում բրինզան օգտագործել մեկամսյա պահպանումից հետո միայն։ Գնելուց հետո հարկավոր է այն պահել այն նույն հեղուկի մեջ, որում գնել եք։ Պարունակում է 18 գրամ սպիտակուց, ճարպեր՝ մինչև 26գրամ, հարուստ է կալցիումով, պարունակում է նաև նատրիում, ֆոսֆոր, վիտամին B1, B2, C:

Կալորիականությունը

100 գրամ բրինզայի կալորիականությունը 260 կկալ է։ Այդքանը բավական է կալցիումի օրական պահանջը բավարարելու համար։

Օգտակար հատկությունները

Շատ օգտակար է առողջության համար։ Հաճախ ուտելու դեպքում օգնում է պահպանել երիտասարդությունը, մաշկի հարթությունը, առաձգականությունն ու թավշյա տեսքը։

Կալցիումի մեծ քանակության և հեշտ յուրացվելու հաշվին օգտակար է ատամների ու ոսկրային համակարգի համար։

Թեթևացնում է մարսողությունը, կանխում ստամոքսում վնասակար մանրէների զարգացումը։