Սեռական հարաբերությունից հետո նկատվող արյունային արտադրությունը հաճախ վախեցնում է կնոջը։ Երբեմն պատճառը կարող է լինել ամբողջովին անվնաս, օրինակ՝ հեշտոցի կամ արգանդի վզիկի լորձաթաղանթի փոքր վնասումը։ Սակայն սեռական հարաբերությունից հետո կրկնվող արյունահոսությունը չպետք է անտեսել, քանի որ այն կարող է կապված լինել նաև գինեկոլոգիական տարբեր խնդիրների հետ։

Այս գանգատի դեպքում կարևոր է ոչ թե ինքնուրույն եզրակացություն անել, այլ պարզել դրա իրական պատճառը։

Որո՞նք կարող են լինել պատճառները
Սեռական հարաբերությունից հետո արյունային արտադրության պատճառները տարբեր են։ Դրանցից առավել հաճախ հանդիպում են՝

• արգանդի վզիկի էկտոպիա,
• հեշտոցի կամ արգանդի վզիկի լորձաթաղանթի փոքր վնասումներ,
• հեշտոցային չորություն,
• արգանդի վզիկի պոլիպներ,
• հեշտոցի կամ արգանդի վզիկի բորբոքային հիվանդություններ,
• սեռավարակներ,
• HPV-ով պայմանավորված արգանդի վզիկի բջջային փոփոխություններ։

Ավելի հազվադեպ, սակայն կարևոր պատճառ կարող են լինել արգանդի վզիկի նախաքաղցկեղային փոփոխությունները։

Հեշտոցային չորությունը նույնպես կարող է պատճառ լինել
Եթե սեռական հարաբերության ընթացքում հեշտոցը բավարար չափով չի խոնավանում, շփումը կարող է առաջացնել լորձաթաղանթի միկրոտրավմաներ և հետագայում՝ փոքր քանակությամբ արյունային արտադրություն։

Հեշտոցային չորություն կարող է հանդիպել տարբեր իրավիճակներում՝ հորմոնային փոփոխությունների, կրծքով կերակրման, դաշտանադադարի շրջանում կամ որոշ դեղամիջոցների օգտագործման դեպքում։

Այդ պատճառով պատճառը պետք է գնահատվի ամբողջական կլինիկական պատկերի հիման վրա։

Ե՞րբ է անհրաժեշտ դիմել գինեկոլոգի
Եթե արյունային արտադրությունը կրկնվում է, առաջանում է առանց դաշտանի հետ կապված ակնհայտ պատճառի կամ ուղեկցվում է ցավով, տհաճ հոտով արտադրությամբ կամ այլ գանգատներով, անհրաժեշտ է դիմել գինեկոլոգի։

Հատկապես կարևոր է չհետաձգել այցը, եթե կինը երկար ժամանակ չի անցել արգանդի վզիկի կանխարգելիչ սկրինինգ։

Ի՞նչ հետազոտություններ կարող են անհրաժեշտ լինել
Հետազոտությունների ընտրությունը կախված է կնոջ տարիքից, գանգատներից և բժշկական պատմությունից։ Բժիշկը կարող է կատարել գինեկոլոգիական զննում և անհրաժեշտության դեպքում նշանակել՝

• ՊԱՊ թեստ,
• HPV թեստ,
• սեռավարակների հետազոտություն,
• տրանսվագինալ ուլտրաձայնային հետազոտություն,
• կոլպոսկոպիա։

Եթե կոլպոսկոպիայի ընթացքում հայտնաբերվում է կասկածելի հատված, կարող է անհրաժեշտ լինել բիոպսիա՝ հյուսվածքի մանրադիտակային գնահատման համար։

Արյունային արտադրությունը միշտ չէ, որ վտանգավոր է

Կարևոր է ընդգծել, որ սեռական հարաբերությունից հետո արյունային արտադրության առկայությունը ինքնին չի նշանակում քաղցկեղ։ Շատ դեպքերում պատճառը բարորակ և հեշտությամբ բուժվող վիճակ է։Սակայն առանց հետազոտության հնարավոր չէ վստահորեն տարբերակել անվնաս պատճառները այն վիճակներից, որոնք պահանջում են ավելի լուրջ մոտեցում։

Սեռական հարաբերությունից հետո մեկանգամյա և շատ փոքր արյունային արտադրությունը կարող է ունենալ պարզ պատճառ, սակայն կրկնվող արյունահոսությունը բժշկական գնահատման ենթակա գանգատ է։