Նորմալ է, եթե կրծքով կերակրման ամբողջ ընթացքում դաշտանը բացակայում է, սակայն հաճախ ցիկլը վերականգնվում է ծննդաբերությունից հետո առաջին տարվա ընթացքում: Առաջին դաշտանը կարող է սկսվել ծննդաբերությունից հետո 6 շաբաթ անց: Ի դեպ, հենց առաջին ցիկլի ընթացքում էլ հնարավոր է կրկին հղիանալ, անգամ կրծքով կերակրման պարագայում: Այդ իսկ պատճառով էլ անհրաժեշտ է օգտվել բեղմնականխման միջոցներից՝ պահպանակ, ներարգանդային պարույր և այլն:

Պետք է հաշվի առնել, որ հնարավոր է հղիանալ անգամ դաշտանի բացակայության դեպքում: Բացատրությունը պարզ և տրամաբանական է: Ծննդաբերությանը հաջորդում է առաջին ձվազատումը, և սեռական հարաբերությունն էլ լինում է հենց այդ «վտանգավոր» շրջանում: Հետևաբար դաշտանը չի վերականգնվում և ձվաբջիջը բեղմնավորվում է:

Խոսենք նաև հղիությունից պաշտպանվելու «բնական» մի մեթոդի՝ լակտացիոն ամենորեայի մասին: Եթե կինը կերակրում է երեխային 3-4 ժամը մեկ՝ ներառյալ նաև գիշերը, և ծննդաբերությունից անցել է նվազագույնը 4-6 ամիս, ապա ձվազատում չի կատարվում՝ պայմանավորված պրոլակտին հորմոնի բարձր մակարդակով: Այս դեպքում էլ, սակայն, բավականին հաճախ է բեղմնավորում տեղի ունենում, այնպես որ ավելի լավ է ռիսկի չդիմել:

Սովորաբար ծննդաբերությունից հետո որոշ շրջան դաշտանը չի վերականգնվում: Առաջին արյունահոսությունն էլ կարող է անկանոն լինել, չափազանց առատ կամ էլ, ընդհակառակը, սակավ: Նորմալ է դա, թե ոչ, կասի գինեկոլոգը, ում ճիշտ է այցելել ծննդաբերությունից 2 ամից անց: