Վալերյանան (կատվախոտ) կրծքով կերակրման շրջանում

Երեխայի լույս աշխարհ գալուց հետո որոշ կանայք ավելի դյուրագրգիռ ու տագնապային են դառնում։ Այդ վիճակում հաճախ հայտնվում են անփորձ մայրերը կամ նրանք, ում վրա ազդում է կյանքի սովորական ռիթմի, ռեժիմի, օրգանիզմում հորմոնների և այլ փոփոխությունները։

Հանգստանալու համար երիտասարդ մայրերը փորձում են գտնել մի միջոց, որը նվազագույն հետանքներ կունենա փոքրիկի համար։ Արդյո՞ք վալերյանկան (կատվախոտ) այդպիսի միջոց է կրծքով կերակրման շրջանում։

Սովորաբար կերակրող մայրերը հրաժարվում են դեղորայքից, ինչը ճիշտ ընտրություն է․ չէ՞ որ մոր օգտագործած ամեն բան կաթի միջոցով փոխանցվում է երեխային, իսկ դեղամիջոցները կարող են վնասել նրա փխրուն օրգանիզմին։

Կրծքով կերակրման շրջանում հանգստացնող ամենաանվնաս միջոցը համարվում է վալերյանան (կատվախոտ)։ Ոմանք նախընտրում են կաթիլները, մյուսները՝ հաբերը։ Կերակրող մայրերը պետք է չմոռանան, որ պատասխանատու են ոչ միայն իրենց, այլև փոքրիկի համար և նախքան որևէ դեղամիջոց օգտագործելը պետք է խորհրդակցեն բժշկի հետ։ Ճիշտ է, կատվախոտը անվնաս դեղամիջոց է, այնուամենայնիվ հարկավոր է բժշկից ճշտել թույլատրելի դեղաչափը։

Կատվախոտը օգնում է կարգավորել այնպիսի վիճակներ, ինչպիսիք են՝

• քնի խանգարումները, 
• սթրեսը, 
• դյուրագրգռությունը, 
• միգրենը, 
• ստամոքսաղիաքային տրակտի և միզարձակման համակարգի նոպաները, 
• անոթային բարձր ճնշումը, 
• արագ սրտխփոցը և այլն։

Ազդեցությունը

Կատվախոտի սեդատիվ ազդեցությունն զգում է ոչ միայն մայրը, այլև երեխան։ Այն բուսական ծագում ունի, և գերդոզավորումը գործնականորեն չի ազդում օրգանիզմի վրա։ Անհատական յուրաքանչյուր դեպք հատուկ վերաբերմունք և դեղաչափ է պահանջում։

Կատվախոտն անմիջապես չի գործում, ազդեցությունն զգացվում է փոքր-ինչ ուշ։ Այն վաճառվում է հաբերի, հեղուկի և թեյի տեսքով, ընդ որում՝ թուրմի ազդեցությունն ավելի ուժգին է։ Հանգստացնող ավելի լավ ազդեցություն է ունենում վալերյանայի (կատվախոտ) և առյուծագի (ռուս․՝ пустырник) թուրմը։

Խմելով դեղամիջոցը, որը բժիշկը սովորաբար նշանակում է օրական 2-3 հաբ, հինգ օր, պետք է հասկանալ, որ հոգնած, դյուրագրգիռ, քունը չառած մայրն իր այդ վիճակով ավելի է ազդում երեխայի վրա, քան կատվախոտը։

Բոլոր դեպքերում հարկավոր է զգուշանալ՝ խստորեն պահպանելով դեղաչափը, սեփական նախաձեռնությամբ չերկարացնել դեղամիջոցի ընդունման ժամանակահատվածը, վալերյանայի (կատվախոտ) ընդունումից հետո ուշադիր լինել երեխայի ֆիզիկական և հուզական արձագանքի հանդեպ։

Եթե առաջանում է՝ քոր, փորկապություն, հակառակ ազդեցություն, որը բնութագրվում է անքնությամբ, էլ ավելի մեծ դյուրագրգռությամբ, անոթային ճնշման բարձրացմամբ, հարկավոր է դադարեցնել ընդունումը և դիմել բժշկի։

Ո՞ր դեղամիջոցներն են, որ ԿԿ-ի շրջանում կարող են փոխարինել կատվախոտին

Կրծքով կերակրման շրջանում թույլատրվում է օգտագործել նաև պերսեն, տենոտեն և այլն։ Լիովին կհանգստացնեն նաև՝ մերսումը, տաք, բուսական մզվածքներով լոգանքը, զբոսանքը, լիարժեք քունը։