Դաշտանի անկանոն ցիկլ

Դաշտանային ցիկլը կնոջ վերարտադրողական առողջության կարևոր ցուցիչներից մեկն է։ Դրա անկանոն լինելը կարող է վկայել որոշակի հիվանդությունների և խնդիրների մասին, սակայն պետք չէ ժամանակից շուտ եզրակացություններ անել և վախենալ։ Երբեմն պատահում է, որ դաշտանի անկանոնությունը բնական պատճառներ է ունենում։ Բնականոն ընթացքից շեղում նկատելու դեպքում միշտ հարկավոր է անհապաղ դիմել բժշկի։

Նախ նշենք, որ յուրաքանչյուր կնոջ դեպքում դաշտանային ցիկլն անհատական է։ «Ոսկե միջինը» 21-35 օր տևողությամբ ցիկլն է։ Ամենատարածված ցուցանիշը 26-29 օրն է։ Եթե ցիկլը տևում է 21 օր, ապա այն համարվում է կարճատև, եթե 35 օրից ավել՝ երկարատև։

Կարևոր պայմանը ցիկլիկությունն է և կայունությունը։ Եթե դաշտանը բացակայում է 40-45 օր, կամ, ընդհակառակը, հաճախակի է սկսվում, ապա այդ վկայում է խանգարման մասին։

Ցիկլի խանգարման հիմնական նշանները

• Դաշտանի բացակայություն 
• Ժամանակային ցիկլի ինտերվալների մշտական կամ մեծ խախտում 
• Յուրաքանչյուր ամիս կարճատև ու երկարատև ցիկլերի հերթագայում 
• Դաշտանի ընթացքում կամ ցիկլի այլ փուլում ոչ տիպիկ ցավ որովայնի ստորին հատվածում 
• Հղիանալու անհնարինություն 

Ցիկլի անկանոնության բնական պատճառներ

Ոչ միշտ է ցիկլի անկանոնությունը վկայում առողջական խնդրի կամ որևէ հիվանդության մասին։ Պատճառները կարող են լինել լիովին տրամաբանական և բնական, դրանցից են՝

• հետվիրահատական շրջան, 
• օրգանիզմի ծերացում և մենոպաուզա, 
• սեռական հասունացում (երբ ցիկլը դեռևս կայացման փուլում է), 
• աբորտ, 
• հղիություն, 
• հետծննդաբերական վերականգնման շրջան։ 

Անբնական պատճառներն են՝

• հորմոնային խանգարում (հիպերպրոլակտինեմիա, հիպերանդրոգենիա, հիպոթիրեոզ և այլն), 
• ձվարանների տարբնույթ հիվանդություններ (պոլիկիստոզ), 
• սեռավարակներ և բորբոքային պրոցեսներ, 
• էնդոմետրիոզ, 
• դեղամիջոցների ընդունում, հատկապես՝ հորմոնային տիպի, հոգեմետ և այլն։ 

Բուժումը

Բժշկի դիմելիս հիմնական խնդիրը ցիկլի անկանոնության պատճառի որոշումն է, որի բնույթից էլ կախված է լինում բուժումը։ Հնարավոր է, որ նշանակվեն հակաբիոտիկներ, հորմոնային միջոցներ, վիտամիններ և սիմպտոմատիկ դեղամիջոցներ։ հաճախ նաև ֆիզիոթերապիա է նշանակվում, կազմվում է բուժիչ դիետա, կազմվում է իմունիտետի բարձրացմանն ուղղված պլան և այլն։