Դդմի կորիզի ձեթն ունի շատ մուգ գույն, նուրբ, հաճելի բույր ու դդմի կորիզի համ։ Պարունակում է վիտամիններ А, Е, С, F, Р, К, Т, ինչպես նաև В խմբի վիտամիններ, բազմաթիվ միկրոտարրեր ու մակրոտարրեր, մարդուն անհրաժեշտ այլ սննդանյութեր։ Օժտված է հակաբորբոքային, վերքերն ապաքինող, մանրէասպան, հակաալերգիկ հատկություններով։

Օգտակար հատկությունները

Բարձրացնում է իմունիտետը և օրգանիզմի պաշտպանական ֆունկցիաները։ Երկարատև օգտագործելու դեպքում զգալիորեն նվազեցնում է օնկոլոգիական հիվանդությունների առաջացման վտանգը։

Լավացնում է լեղապարկի և լյարդի գործունեությունը։ Ցուցված է լյարդի, լեղուղիների և լեղապարկի հիվանդություններ ունեցող մարդկանց։ Բարենպաստ ազդեցություն է թողնում ստամոքսի, աղիների և ամբողջ մարսողական համակարգի աշխատանքի վրա։ Օգտակար է խոցի, գաստրիտի, կոլիտների, փորկապության և այլ հիվանդությունների դեպքում։

Օժտված է նաև հակամակաբույծային ազդեցությամբ։ Բարենպաստ ազդեցություն է թողնում սրտանոթային համակարգի վրա, կանխում է և օգնում բուժել սրտի, արյան ու անոթների հիվանդությունները։ Նպաստում է անոթների պատերի ամրացմանը, կարգավորում է զարկերակային ճնշումը, ամրացնում սրտամկանը, նվազեցնում խոլեստերինի մակարդակը։

Օգտագործվում է նաև միզասեռական համակարգի հիվանդությունների բուժման և աշխատանքի կարգավորման համար։

Շատ օգտակար է տղամարդկանց համար։ Բարենպաստ ազդեցություն է թողնում շագանակագեղձի աշխատանքի վրա, պաշտպանում է բորբոքումից, նպաստում է պոտենցիայի բարձրացմանը, նվազեցնում է անպտղության առաջացման վտանգը։

Բացառիկ օգտակարություն ունի նաև կանանց համար։ Օգտագործվում է գինեկոլոգիական բազմաթիվ հիվանդությունների բուժման և կանխարգելման համար։ Նպաստում է նախադաշտանային համախտանիշի նվազմանը, լավացնում է ինքնազգացողությունը կլիմաքսի ընթացքում։ Բարենպաստ ազդեցություն է թողնում նաև վերարտադրողական համակարգի վրա, նվազեցնում է անպտղության առաջացման վտանգը։

Ցուցված է հղի կանանց։

Նպաստում է նյարդային համակարգի աշխատանք կարգավորմանը, օգնում է պայքարել գլխացավի, անքնության և այլ խնդիրների դեմ։ Շատ օգտակար է տեսողության համար։

Հաճախ օգտագործելու դեպքում օգնում է խուսափել լնդերի և բերանի խոռոչի հիվանդություններից։

Օգտագործվում է մաշկային զանազան հիվանդությունների բուժման համար՝ էկզեմա, փսորիազ, ցան և այլն։ Լավացնում է մաշկի, մազերի ու եղունգների վիճակը, ունի երիտասարդացնող հատկություն։

Հակացուցումները

Հակացուցված է ձեթի հանդեպ օրգանիզմի անհանդուրժողականության դեպքում։ Այն մարդիկ, որոնք շաքարային դիաբետ կամ լեղաքարային հիվանդություն ունեն, պետք է խորհրդակցեն բժշկի հետ։

Օգտագործման ձևերը

Կարելի է դդմի կորիզի ձեթով համեմել աղցանները, վինեգրետները, շոգեխաշած բանջարեղենը, կարտոֆիլի պյուրեն և այլ ուտեստները։ Այն օգտագործում են մսի, ձկան ու բանջարեղենի համար նախատեսված սոուսներ պատրաստելիս։ Հարմար չէ տապակելու համար, քանի որ այդպիսով կորցնում է օգտակար հատկությունների մեծ մասը։