Բխկոցը կերակրելուց հետո

Կերակրման ժամանակ երեխան երբեմն կուլ է տալիս օդ, որը կուտակվում է մարսողական տրակտում և կարող է առաջացնել գազեր, փքվածություն ու փսխում:  

Հետևաբար, յուրաքանչյուր կերակրման ավարտից հետո դուք պետք է օգնեք ձեր երեխային օդից ազատվելու՝ բխկալու միջոցով: Առաջարկում ենք 3 դիրք՝ բխկալու գործընթացը հեշտացնելու համար: Հետևյալ դիրքերը կօգնեն  երեխային բխկալու. 

 

Ուսի վրա 

Գրկե՛ք երեխային այնպես, որ գլուխը լինի ձեր ուսի վրա, ձեռքերը՝ մեջքին, իսկ ոտքերը՝ մի փոքր ծալված:  Մի ձեռքը դրեք երեխայի մեջքին և գլխին, իսկ  մյուս ձեռքով բռնեք երեխայի ոտքերից։ Համոզվեք, որ նրա գլուխը և իրանը հետ չեն թեքվել: Դուք կարող եք նրբորեն մերսել երեխայի մեջքը: Այս դիրքում փոքրիկի կրծքավանդակը փոքր-ինչ սեղմվում է, ինչը նրան թույլ է տալիս ազատվել կուտակված օդից: 

 

Ծնկների վրա 

Նստե՛ք աթոռին: Երեխայի մարմնի ստորին հատվածը դրեք մեկ ազդրի վրա, իսկ մյուս ազդրին՝ կրծքավանդակը, բարձրացեք այնպես, որ երեխայի մարմինը  45 աստիճանից ավելի անկյան տակ լինի հատակի նկատմամբ: Մի ձեռքում պահեք երեխայի ձեռքերն ու կզակը, իսկ մյուսով նրբորեն մերսեք մեջքը: 

 

Կիսապառկած 

Երեխայի մեջքը հենեք ձեր փորին, որպեսզի նա ունենա կիսապառկած դիրք՝ 45 աստիճան թեքությամբ: Նրա գլուխը հենեք  ձեր նախաբազկի վրա, իսկ մարմնի ստորին հատվածը՝ ձեր ազդրին: Այս դիրքը հարմար է այն երեխաների համար, ովքեր հաճախ են փսխում: Այս դիրքը կարելի է կիրառել, եթե  երեխան արդեն 3 ամսական է: