Գիտնականները պնդում են, որ ալկոհոլի ընդունումից հետո քունը լիարժեք չի լինում 

Հետազոտությունները հաստատում են, որ քնելուց առաջ ալկոհոլի ընդունումը կարող է օգնել քուն մտնելուն, բայց միևնույն ժամանակ խանգարում է քնի բնական ցիկլերին և արթնությանը։ 

Ըստ Լոնդոնի «Քնի կենտրոնի» աշխատակազմի՝ ալկոհոլը նվազեցնում է քուն մտնելու տևողությունը և ապահովում խոր քուն: Այնուամենայնիվ, «արագ» քնի ցիկլը տուժում է, որի ընթացքում երազներ ենք տեսնում, որն ամենակարևորն է ուժերի վերականգնման համար: 

Ալկոհոլի երկարատև չարաշահումը կարող է հանգեցնել անքնության: 

Մինչև վերջերս քնելուց առաջ ալկոհոլի փոքր չափաբաժինը չի համարվել վտանգավոր, և հիվանդանոցներում ու ծերանոցներում երբեմն նույնիսկ առաջարկել են գիշերը լավ քնելու համար մի քանի կում ալկոհոլ օգտագործել:  

Խանգարված քուն 

Մի բաժակ ալկոհոլը կարող է օգնել քնելուն, բայց եթե այն սովորություն է դառնում, ապա կարող է հանգեցնել քնի հետ կապված լուրջ խնդիրների: 

Եթե ալկոհոլից հնարավոր չէ խուսափել, ավելի լավ է խմել քնելուց երկու ժամ առաջ, քանի որ այս ընթացքում ալկոհոլի ազդեցությունը թուլանում է: 

Բայց սա վտանգավոր է, քանի որ ալկոհոլի ընդունումը ոչ միայն դառնում է սովորություն, այլև հանգեցնում է ուղեղի գործունեության մեջ այն բնական ռիթմերի ճնշմանը, որոնք ուղեկցվում են երազներով և լիարժեք քնի պայման են: Բացի այդ, ալկոհոլը հանգեցնում է դժվարաշնչության: Արդյունքում մարդիկ սկսում են տառապել խռմփոցից, իսկ քրոնիկ խռմփացնելը կարող է հանգեցնել շնչառության ռիթմի վտանգավոր խախտման և նույնիսկ դրա կանգի: 

Այս վիճակը կոչվում է ապնոէ: 

Ալկոհոլը ազդում է քնի երեք ասպեկտների վրա: 

Նախ, ալկոհոլը արագացնում է քուն մտնելը: Երկրորդ, այն շատ խորը քուն է առաջացնում: Այս ախտանիշները շատ նման են հակադեպրեսանտներ ընդունող հիվանդների շրջանում նկատվող շեղումներին: Այս կերպ  է բացատրվում ալկոհոլի գրավչությունը՝ անքնությունից տառապողների համար: 

Այնուամենայնիվ, կա նաև քնի երրորդ ասպեկտ, որն ալկոհոլի ազդեցությամբ խափանվում է ավելի ուշ՝ աչքերի արագ շարժումներով ուղեկցվող փուլում: Սա քնի այսպես կոչված «արագ» փուլն է, որն ամենաարդյունավետն է մարդու նորմալ հոգեֆիզիոլոգիական գործունեության վերականգնման համար: 

Ալկոհոլը չի կարող փոխարինել քնաբերներին։ Ալկոհոլի ազդեցությամբ քունը  սկզբնական շրջանում կարող է խորը լինել, սակայն հետո խանգարվել: Բացի այդ՝ խորը քունը կարող է առաջացնել խռմփոց և նույնիսկ շնչառության կանգ։

 

Աղբյուրը
 
 Բաժանորդագրվեք նաև մեր․ Տելեգրամյան ալիքին , Ֆեսբուքյան էջին, Ինստագրամյան էջին , Յութուբյան ալիքին