Ինչո՞ւ է դաշտանը ավելի վաղ սկսվում և ինչպե՞ս այն կարգավորել

Ինչո՞ւ է դաշտանը ավելի վաղ սկսվում և ինչպե՞ս այն կարգավորել

Միջինում դաշտանը տեղի է ունենում 28 օրը մեկ, ավելի ճիշտ՝ 21-ից 35-րդ օրերին։ Կանոնավոր ցիկլ ունեցող կանայք սովորաբար գիտեն հաջորդ դաշտանի մոտավոր ամսաթիվը, բայց երբեմն ցիկլը ավելի քիչ կանխատեսելի է, և դա կարող է նորմալ լինել:

Այս գործընթացը կարգավորվում է բարդ հորմոնալ մեխանիզմով, որի վրա կարող են ազդել տարբեր գործոններ, ինչպիսիք են՝ սթրեսը, ապրելակերպի փոփոխությունները, դեղամիջոցները և նույնիսկ հիվանդությունները:

Ինչո՞ւ է դաշտանը սկսվում ավելի վաղ

Պատճառները կարող են շատ լինել, և դրանցից մի քանիսը միանգամայն նորմալ են։

1. Սեռական հասունություն Սեռական հասունացման ընթացքում մարմինը միայն ցիկլ է սահմանում, ուստի բացարձակապես նորմալ է, եթե նրա տևողությունը ամսից ամիս տարբերվում է:

Ինչ անել Այցելեք գինեկոլոգի, կատարեք կանխարգելիչ հետազոտություններ, նշեք ցիկլերը օրացույցում և համբերատար եղեք. մի քանի տարի անց դաշտանն ավելի կանխատեսելի կդառնա։

2. Դաշտանադադարի սկիզբ Սովորաբար կանայք դա զգում են 47-51 տարեկանում։ Այստեղ իրավիճակը հակառակ է. վերարտադրողական գործառույթը անհետանում է, հորմոնների քանակը նվազում է, ցիկլը խանգարվում է։

Ինչ անել Դիմեք գինեկոլոգի: Բանն այն է, որ դաշտանադադարի ժամանակ ցիկլային փոփոխություններից բացի կարող են անհանգստացնել այլ ախտանշաններ, ինչպիսիք են՝ տաք բռնկումները, քաշի ավելացումը, տրամադրության փոփոխությունները և հեշտոցի չորությունը: Դրանց դիմանալը պարտադիր չէ․ բժիշկը կարող է ընտրել փոխարինող հորմոնալ թերապիա և այլ միջոցներ, որոնք կօգնեն ձեզ հանգիստ հաղթահարելու այդ շրջանը։

3. Սթրես Սթրեսը մարմնի արձագանքն է վտանգի նկատմամբ: Այն ուղեկցվում է օրգանիզմում մի շարք քիմիական փոփոխություններով։ Ահա թե ինչպես է օրգանիզմն արձագանքում այն ամենին, ինչ կատարվում է ձեր կյանքում։ Նույնիսկ կարճատև սթրեսն ու անհանգստությունը կարող են նպաստել հորմոնալ անհավասարակշռության, ինչի պատճառով այն վաղաժամ կամ հետաձգված դաշտանի հիմնական պատճառ է դառնում:

Ինչ անել

Դուք ընդհանրապես չեք կարող խուսափել սթրեսից, կարող եք միայն փորձել թույլ չտալ, որ այն չափազանց նշանակալի դառնա: Եթե զգում եք, որ սթրեսին չեք կարող դիմակայել, փորձեք.

• կատարել խորը շնչառական վարժություններ և մեդիտացիա:

• Ձեր օրգանիզմի մասին հոգ տանելը, այսինքն քնի գրաֆիկը պահպանելը, ճիշտ սնվելը, վատ սովորություններից հրաժարվելը, առողջ ապրելակերպ վարելը մեծացնում են սթրեսի նկատմամբ դիմադրողականությունը։

• «Ոչ» ասել ավելորդ պարտականություններին, երբ չափազանց զբաղված, հոգնած կամ սթրեսային եք: Եվ ընդհանրապես հրաժարվեք անել այն, ինչ չեք ուզում, եթե դրա կարիքը չունեք։

• Մի՛ խուսափեք սիրելիների հետ շփումից․ կապի մեջ մնացեք նրանց հետ, ովքեր աջակցում են ձեզ և օգնում ավելի լավ զգալու:

4. Կենսակերպի փոփոխություններ Դրանք կարող են լինել ֆիզիկական ակտիվության, սնվելու, քնի ռեժիմի փոփոխություններ։ Հատկապես, եթե դրանք ազդում են քաշի վրա Ճարպային հյուսվածքը նաև արտադրում է որոշ հորմոններ, այդ թվում՝ ստերոիդներ, որոնք ներառում են սեռական հորմոններ։ Այսպիսով, քաշի տատանումները շեղում են հորմոնների հավասարակշռությունը, որոնք անհրաժեշտ են կանոնավոր ցիկլի համար: Ինչ անել Եթե նոր ապրելակերպի պատճառով դաշտանը մի փոքր շեղվել է, ապա դա խնդիր չէ։ Բայց եթե այն խանգարվել է, ապա պետք է մտածել այդ մասին և վերլուծել, թե ինչ է փոխվել։ Պարտադիր չէ, որ քաշն առաջացնի ցիկլի խախտում, բայց առանց դրա կարգավորման հնարավոր չի լինի վերականգնել նորմալ դաշտանը։

5. Հորմոնալ հակաբեղմնավորիչ հաբերի ընդունում Ակտիվ հաբերի չափաբաժինների միջև արյունահոսությունը պայմանավորված է դեղամիջոցի ժամանակավոր դադարեցմամբ: Այնուամենայնիվ, երբեմն թեթև արյունահոսություն սկսվում է մինչև փաթեթի հաբերի սպառվելը: Այս երևույթը կոչվում է բեկումնային արյունահոսություն: Հատկապես հաճախ դա տեղի է ունենում այն ընդունելու առաջին մի քանի ամիսներին, մինչ մարմինը փորձում է հարմարվել ընդունվող հորմոններին:

Ի՞նչ անել Շարունակեք ընդունել հաբերը: Ընդհատվող արյունահոսությունը չի նշանակում, որ հաբերը չեն գործում: Նշեք օրացույցում նման օրերը, եթե դրանք շատ հաճախ են կրկնվում, միգուցե գինեկոլոգը ձեզ համար կընտրի հորմոնների ավելի բարձր կոնցենտրացիայով դեղամիջոց:

6. Էնդոմետրիոզ Էնդոմետրիոզն ավելի հաճախ հանդիպում է 30-40 տարեկան կանանց մոտ: Դա տեղի է ունենում, երբ հյուսվածքը, որը նման է էնդոմետրիումի լորձաթաղանթին, դուրս է գալիս արգանդից և աճում այնտեղ:

Հիվանդության ճշգրիտ պատճառը անհայտ է, սակայն ենթադրվում է, որ դրա զարգացման մեջ ներգրավված են գենետիկական և հորմոնալ գործոններ: Էնդոմետրիոզը ազդում է դաշտանային ցիկլի վրա՝ առաջացնելով.

• ծանր և ցավոտ դաշտան

• արյունահոսություն ցիկլի կեսին

• անկանոն դաշտան Բացի այդ, այն հաճախ ցավ է առաջացնում որովայնի և մեջքի ստորին հատվածում՝ հատկապես սեռական հարաբերությունից հետո և դաշտանի ժամանակ: Այն նաև անպտղության ամենատարածված պատճառներից է:

Ի՞նչ անել Եթե նկատում եք ցիկլի վերը թվարկված փոփոխությունները, ապա պետք է դիմել գինեկոլոգի: Ախտորոշումը միշտ չէ, որ հնարավոր է անել անմիջապես, բայց որքան շուտ սկսեք բուժումը, այնքան ավելի հեշտ կլինի ձերբազատվել ախտանիշներից և բարդություններից։

7. Պոլիկիստոզային ձվարանների համախտանիշ Այս դեպքում խախտվում է ձվարանների աշխատանքը, ինչի պատճառով դրանցում առաջանում են բազմաթիվ կիստաներ, ակտիվանում են բջիջները, որոնք արտադրում են տեստոստերոն: Այդ իսկ պատճառով պոլիկիստոզային ձվարանների համախտանիշը արտադրում է մեծ քանակությամբ անդրոգեններ, որոնք կանխում կամ հետաձգում են ձվազատումը (օվուլյացիան)՝ առաջացնելով անկանոն դաշտան:

Հետևաբար, դաշտանը դառնում է շատ անկանխատեսելի։ Պոլիկիստոզային ձվարանների համախտանիշի ախտանիշներն են՝

• ակնե

• քաշի ավելացում

• մարմնի վրա կոշտ մազեր

• գլխամաշկի մազաթափություն:

Սովորաբար այս նշաններն առաջին անգամ հայտնվում են դեռահասների կամ երիտասարդ աղջիկների մոտ: Ինչ անել Պոլիկիստոզային ձվարանների համախտանիշը ցիկլի խանգարումներից բացի բազմաթիվ այլ խնդիրներ է առաջացնում։ Հիմնականը անպտղությունն է։ Հետևաբար, եթե ունեք գանգատներ, պետք է խորհրդակցեք գինեկոլոգի հետ: Այս դեպքում գինեկոլոգը կնշանակի ձվարանների ուլտրաձայնային հետազոտություն և արյան ստուգում սեռական հորմոնների համար:

Այս համախտանիշի բուժման համար սովորաբար խորհուրդ են տրվում հակաբեղմնավորիչ հաբեր և դեղամիջոցներ:

8. Իմպլանտացիոն արյունահոսություն Շատ կանայք ունենում են թեթև արյունահոսություն, երբ սաղմը կպչում է արգանդի պատին: Դա կոչվում է իմպլանտացիա: Սովորաբար դա տեղի է ունենում բեղմնավորումից հետո 10-14-րդ օրը, երբ կինը դեռ չի կարող իմանալ հղիության մասին: Հետևաբար, այն հաճախ շփոթվում է հաջորդ ցիկլի սկզբի հետ:

Ի՞նչ անել

Սովորաբար իմպլանտացիոն արյունահոսությունը արագ է անցնում, ուստի բժշկի մոտ գնալու կարիք չկա։ Բայց եթե նկատում եք առանց պատճառի արյունային արտադրություն մինչև դաշտանը, որը երբեք չի եղել, սա առիթ է մեկ շաբաթից հղիության թեստ անելու։

9. Վիժում Բոլոր հղիությունների մոտ մեկ քառորդն ընդհատվում է շատ վաղ՝ մինչև դաշտանի սպասվող սկիզբը։ Այս երևույթը կոչվում է կենսաքիմիական հղիություն. ԽԳԳ-ն արդեն կարող է աճել արյան մեջ, բայց նշաններ կարող են չհայտնաբերվել։

Ի՞նչ անել

Կանանց մեծամասնությունը երբեք չի իմանա, որ զգացել է այս երևույթը։ Դա միայն նշանակում է, որ սաղմը ունեցել է կոպիտ գենետիկ խանգարումներ, որոնց պատճառով այն ոչ մի կերպ չի կարողացել զարգանալ։ Բայց դա չի նշանակում, որ ապագայում հնարավոր չի լինի երեխա ունենալ։

10. Սեռական ճանապարհով փոխանցվող վարակներ Սեռական ճանապարհով փոխանցվող այլ ինֆեկցիաներ (սեռավարակներ), ներառյալ քլամիդիան, գոնորեան և սիֆիլիսը, կարող են դաշտանների միջև ընկած հատվածներում արյունային արտադրություն առաջացնել: Դրանք կարելի է շփոթել նոր ցիկլի սկզբի հետ:

Ամենատարածված ախտանիշներն են.

• առատ արտադրություն հեշտոցից՝ երբեմն դեղին կամ կանաչավուն երանգով և տհաճ հոտով,

• միզարձակման ավելացում,

• ցավ սեռական հարաբերության կամ միզելու ժամանակ,

• արյունային արտադրություն հետանցքից։ Ինչ անել Նման ախտանիշների դեպքում պետք է անմիջապես դիմել բժշկի:

11. Վահանաձև գեղձի հիվանդություններ Վահանաձև գեղձի հիվանդություններն ուղղակիորեն չեն ազդում ցիկլի վրա, բայց դրանք առաջանում են հիպոֆիզային գեղձի խանգարումներից կամ խանգարում են նրա բնականոն գործունեությանը։ Հիպոֆիզը մարդու էնդոկրին համակարգի կենտրոնական օրգանն է, որը վերահսկում է բոլոր հորմոնները, ներառյալ սեռական հորմոնները:

Ինչ անել Եթե դուք անընդհատ բախվում եք ցիկլի խանգարումների, իսկ գինեկոլոգը բացառել է պաթոլոգիան, ապա, ամենայն հավանականությամբ, ձեզ կուղղորդեն էնդոկրինոլոգի մոտ և կառաջարկեն հետազոտվել վահանաձև գեղձի հորմոնների համար։ Եթե էնդոկրինոլոգը հորմոնների հետ կապված խնդիր հայտնաբերի, ապա կնշանակի թիրոքսինային և յոդի պատրաստուկներ։

Ինչպե՞ս ցիկլը դարձնել կանոնավոր

Ցիկլի խանգարումներից խուսափելու համար փորձեք կարգավորել ձեր ապրելակերպը.

• Փորձեք չափավոր մարզվել և ուտել սննդարար սնունդ: Եթե ցանկանում եք նիհարել, դա արեք աստիճանաբար՝ կալորիաների սահմանափակման միջոցով՝ կտրուկ դիետաների դիմելու փոխարեն։

• Կրճատեք երկար կամ ինտենսիվ վարժությունները: Համոզվեք, որ բավականաչափ հանգստանում եք:

• Վերահսկեք սթրեսը, սովորեք հանգստանալ։

• Օգտագործեք հակաբեղմնավորիչ հաբեր կամ հակաբեղմնավորման այլ մեթոդներ՝ միայն ըստ ցուցումների:

• Կանոնավոր կերպով այցելեք գինեկոլոգի և հետազոտվեք։

Աղբյուրը
 
Բաժանորդագրվեք նաև մեր․ Տելեգրամյան ալիքին , Ֆեսբուքյան էջին, Ինստագրամյան էջին, Յութուբյան ալիքին