Կանանցից շատերն անմոռանալի բերկրանք են ապրում առաջնեկի ծնունդով՝ անկախ նրա սեռից: Երկրորդ երեխայի պարագայում երիտասարդ ծնողներն սկսում են հետաքրքրվել երեխայի սեռի պլանավորմամբ: Բազմաթիվ տեսություններ կան այն մասին, թե ինչն է որոշիչ դեր խաղում նոր կյանքի ձևավորման հարցում: Գիտնականների համար այս հարցն իսկական գլխացավանք է դարձել տասնամյակներ շարունակ:

Նորագույն հետազոտություններն ու վիճակագրական տվյալները վկայում են, որ հավանական է՝ որոշիչ դեր խաղում է երեխայի հոր գենետիկական ֆոնդը: Որոշակի սեռի սերունդ ունենալու հակումն ապագա երեխայի հայրը ժառանգում է իր ծնողներից: Սա վերջերս հաստատվել է գիտնականների կողմից, ովքեր լայնամասշտաբ հետազոտություններ են կատարել երեխայի սպասող զույգերի շրջանում:

Գիտնականներն ուսումնասիրել են 927 ընտանիքի, ինչպես նաև նրանց տոհմածառը (մինչև 1600 թվականը): Այդպիսով՝ վիճակագրությունն ընդգրկել է մոտ 500 000 մարդ: Արդյունքները ցնցող են եղել:Պարզվում է, որ տղա երեխա ունենալու հավանականությունը մեծ է այն հայրերի համար, ովքեր իրենք շատ եղբայրներ ունեն, իսկ աղջկա հայր ավելի հավանական է, որ կդառնա նա, ով ավելի շատ քույրեր ունի, քան եղբայրներ:

Հիմնվելով ուսումնասիրությունների արդյունքների վրա՝ գիտնականներն այսօր հակված են հավատալու, որ գենետիկ նախատրամադրվածությունը մեծ դեր է խաղում ապագա երեխայի սեռի հարցում: Սրանով է բացատրվում օրինակ հետպատերազմյան շրջանում մեծաքանակ տղաների ծնունդը: Մի քանի տղա ունեցող ընտանիքների համար հավանականությունը, որ նրանցից մեկը կվերադառնա պատերազմից ավելի մեծ էր, քան այն ընտանիքների համար, ովքեր մեկ տղա ունեին: Այսպիսով՝ հետպատերազմյան շրջանում հենց այն տղամարդիկ են գերակշռել, ովքեր տղա երեխա ունենալու նախատրամադրվածություն ունեին. այդ կերպով նպաստում էին արական սեռի երեխաների ծնունդի աճին: