Դաշտանային ցավերը կանանց շրջանում ամենահաճախ հանդիպող գանգատներից են։ Սակայն յուրաքանչյուր ցավ չի կարելի համարել «նորմալ»։ Այն դեպքերում, երբ ցավը խանգարում է առօրյա կյանքին, աշխատանքին կամ ուղեկցվում է այլ ախտանշաններով, անհրաժեշտ է մասնագիտական գնահատում՝ հնարավոր գինեկոլոգիական պաթոլոգիաները բացառելու նպատակով։

 Ի՞նչ է դիսմենոռեան
Դիսմենոռեան դաշտանային ցավն է, որը սովորաբար տեղակայվում է որովայնի ստորին հատվածում և կարող է տարածվել դեպի գոտկային շրջան կամ ազդրեր։

Տարբերում են՝
Առաջնային դիսմենոռեա

Առաջանում է առանց օրգանական գինեկոլոգիական հիվանդության և առավել հաճախ կապված է պրոստագլանդինների բարձր մակարդակի հետ, որոնք առաջացնում են արգանդի ինտենսիվ կծկումներ։

 Երկրորդային դիսմենոռեա
Կապված է կոնկրետ գինեկոլոգիական հիվանդությունների հետ և սովորաբար զարգանում է ավելի ուշ տարիքում։

Որո՞նք կարող են լինել երկրորդային դիսմենոռեայի պատճառները

• Էնդոմետրիոզ
• Ադենոմիոզ
• Արգանդի միոմա
• Քրոնիկ բորբոքային հիվանդություններ
• Ներարգանդային պաթոլոգիաներ

Երբ է անհրաժեշտ դիմել գինեկոլոգի

• Ցավը ժամանակի ընթացքում ուժեղանում է
• Դաշտանային ցավերը խանգարում են առօրյա ակտիվությանը
• Առկա են առատ արյունահոսություններ
• Ցավն ուղեկցվում է անպտղությամբ կամ ցավոտ սեռական հարաբերությամբ
• Ցավազրկողներն այլևս արդյունավետ չեն

Դիսմենոռեայի պատճառների գնահատման համար կարող են կիրառվել՝

• Գինեկոլոգիական զննություն
• Փոքր կոնքի ուլտրաձայնային հետազոտություն
• Հորմոնալ հետազոտություններ
• Անհրաժեշտության դեպքում՝ լապարոսկոպիա

Բուժումը կախված է պատճառից և կարող է ներառել՝

•  Ոչ ստերոիդային հակաբորբոքային դեղամիջոցներ՝Պրոստագլանդինների ազդեցության նվազեցման նպատակով

Հորմոնալ թերապիա՝Օվուլյացիայի և էնդոմետրիումի ակտիվության կարգավորման համար

Հիմնական հիվանդության բուժում
Օրինակ՝ էնդոմետրիոզի կամ միոմայի բուժում

Կենսակերպի փոփոխություններ
Քնի կարգավորում, ֆիզիկական ակտիվություն, սթրեսի նվազեցում

Ցավոտ դաշտանային ցիկլը միշտ չէ, որ անվնաս ֆիզիոլոգիական երևույթ է։ Ժամանակին ախտորոշումն ու ճիշտ բուժումը թույլ են տալիս ոչ միայն նվազեցնել ցավը, այլև կանխել հնարավոր վերարտադրողական բարդությունները։