Զարթխումից (похмелье) ազատվելու յոթ միջոց
2576
Զարթխումից (похмелье) ազատվելու յոթ միջոց
Ամեն հաճույք իր գինն ունի: Եթե ընկերների հետ երեկույթի ժամանակ կորցնում եք զգոնությունը և շատ եք խմում, ապա առավոտյան կարող եք զղջալ նախորդ օրվա զվարճանքի համար: Բարեբախտաբար, ժողովրդական բազմաթիվ բաղադրատոմսեր կան, որոնք կարող են ոտքի հանել ալկոհոլը չարաշահած մարդուն: Դրանց մի մասը, օրինակ՝ վարունգի թթուն և հանքային ջուրը, վաղուց արդեն ծանոթ են շատերին, ուստի փորձել ենք գտնել ավելի էկզոտիկ բաղադրատոմսեր, որոնք նույնպես օգնում են տվյալ իրավիճակում: Այնուամենայնիվ, հիշեցնում ենք՝ ալկոհոլի չարաշահումը լրջորեն վնասում է առողջությանը:
1 Կիտրոնի շերտեր
Պուերտո Ռիկոյում հավատում են, որ եթե մեծ երեկույթի նախօրեին թևատակերին կիտրոնի շերտեր քսեն, այն կօգնի խուսափելու ջրազրկումից, որն ուժեղ զարթխումի պատճառներից մեկն է: Այս տարօրինակ բաղադրատոմսը վերագրվում է ծովահեն Ռոբերտո Կոֆրեսին. ծովային գայլը ցիտրուսային մրգերը ոչ միայն քսում էր թևատակերին, այլև, ասում են՝ ուտում էր: Չնայած այն հանգամանքին, որ այս տարբերակը բավականին վիճելի է, այնուամենայնիվ, կիտրոնը դեռևս լայնորեն օգտագործվում է՝ որպես կանխարգելիչ միջոց, իսկ որպես հաճելի առավելություն` նուրբ բույր, որն ուղեկցում է ձեզ ամբողջ երեկույթի ընթացքում:
2 Տոմատի հյութ
Նրանք, ովքեր բուռն երեկույթից հետո ունենում են գլխացավ, գիտեն, որ տոմատի հյութը կարող է էապես բարելավել իրենց վիճակը: Այն օժտված է այս հրաշագործ ազդեցությամբ՝ շնորհիվ իր կազմում առկա վիտամինների, պեկտինի, խնձորաթթվի և ծծմբական թթվի։ Այս քիմիական կոկտեյլը օգնում է ավելի արագ այրելու ալկոհոլը և տոքսինները, մաքրելու օրգանիզմը: Իսկ եթե հյութի մեջ ավելացնեք նաև մի քանի կաթիլ տաբասկո տաք սոուս, ապա այս գործընթացները միայն կարագանան:
3 Հում ձու
Հավի հում ձուն այս դեպքում ևս օգնում է: Սովորաբար խմում են առավոտյան՝ դատարկ ստամոքսին, երբ ալկոհոլային թունավորման նախանշաններն արդեն ակնհայտ են լինում: Այնուամենայնիվ, այս տարբերակը կարող է համարվել որպես զարթխումի կանխման բավականին արդյունավետ միջոց: Խնջույքից քիչ առաջ կամ ընթացքում խմած հում ձուն պարունակում է ավիդին: Այն օգնում է B խմբի վիտամիններին, որոնք պատասխանատու են էթանոլի վերամշակման համար:
4 Ումեբոսի
Չորացրած կամ թթվեցրած ճապոնական սալորը Ասիայում ընդունված է՝ որպես զարթխումից ազատվելու միջոց: Այն թթվեցնում են, որից հետո չորացնում: Պտուղները նման են սալորի և ծիրանի: Ումեբոսին ուտում են նաև քրոնիկ հոգնածության, սրտի հիվանդությունների և կոկորդի ցավի դեպքում: Նրա՝ զարթխումից ազատելու ազդեցությունը պայմանավորված է պեկտինների բարձր պարունակությամբ:
5 Ակտիվացված ածուխ
Ակտիվացված ածուխն օգնում է ոչ միայն սննդային, այլև ալկոհոլային թունավորման դեպքում, ինչը հաճախ ուղեկցվում է զարթխումի համախտանիշով: Դա բնական ներծծվող նյութ է, որը, ներթափանցելով ստամոքսի, այնուհետև աղիքների մեջ, կլանում է տոքսինները, այնուհետև բնական ճանապարհով արտազատվում է օրգանիզմից: Ածուխն օգտագործվում է որպես կանխարգելիչ միջոց (այս դեպքում՝ քաշի յուրաքանչյուր տասը կգ-ի համար պետք է ընդունել մեկ դեղահաբ՝ երեկույթից հետո՝ քնելուց առաջ) և որպես շտապ օգնություն՝ արդեն իսկ առկա զարթխումի դեպքում (նույն քանակությամբ հաբերը պետք է մանրացնել, լուծել մեկ բաժակ ջրի մեջ և խմել խառնուրդը):
6 Բեկոնով սենդվիչ
Բրիտանացի գիտնականները բազմիցս զարմացրել են տարբեր բնագավառներում արած իրենց հայտնագործություններով. զարթխումի թեմային ևս անդրադարձել են: 2009 թ-ին Նյուքասլի համալսարանի գիտնականները հայտարարեցին, որ ալկոհոլի չարաշահման հաջորդ առավոտյան վատ ինքնազգացողությունից ազատվելու լավագույն միջոցը բեկոնով սենդվիչն է: Խոզապուխտը պարունակում է մեծ քանակությամբ ամինաթթուներ, իսկ հացը հագեցնում է թուլացած օրգանիզմն արագ ածխաջրերով: Այնուամենայնիվ, առաջին դեպքը չէ, որ բրիտանացի գիտնականները մտածում են ալկոհոլի չարաշահման բացասական հետևանքները ճարպոտ մսի միջոցով վերացնելու մասին: Մսով արգանակներն ու ապուրները՝ որպես բուռն երեկոյից հետո առավոտյան ուտեստ, առաջարկվում են ամբողջ աշխարհում՝ Արևելյան Եվրոպայից մինչև Լատինական Ամերիկա։
7 Աղ դրված տառեխ
Գերմանիայում խնջույքին հաջորդող առավոտյան, սովորաբար նախընտրում են ծովատառեխ, այլ ոչ թե գարեջուր, ինչպես կարծում եք: Ճարպոտ ձկներից պատրաստված այս ուտեստը կոչվում է ռոլմոպս։ Այն բաղկացած է ծովատառեխի բարակ կտորներից, որոնք փաթաթված են թթվեցրած բանջարեղենով: Ժողովուրդն այն անվանում է՝ «նախաճաշ խմելուց հետո»․ անվանումն արդեն իսկ խոսում է ուտեստի օգտակար հատկության մասին։
