Ինչու են այտուցվում ոտքերը, ձեռքերը և դեմքը, և ինչպես վերացնել այտուցը 

 

Այտուցը կարող է լինել և՛ անվտանգ, և՛ վտանգավոր: Բայց հաճախ այն  ազդարարում է, որ դուք ունեք  առողջական որևէ խնդիր։ 

Երբ է անհրաժեշտ  շտապ օգնություն կանչել 

Անհապաղ կանչեք բժշկական օգնություն, եթե առկա է հետևյալ ախտանիշներից որևէ մեկը. 

• այտուցը հանկարծակի և արագորեն մեծանում է 

• այն (անկախ նրանից, թե մարմնի որ հատվածում է առաջացել) ուղեկցվում է շնչարգելությամբ, կրծքավանդակի ցավով 

• այտուցի առաջացման հետ մեկտեղ զգոացվում է անհանգստություն, ուժեղ գլխապտույտ կամ գլխացավ 

• միայն մեկ ոտքն է այտուցված: 

Շտապ օգնություն կանչելը պարտադիր չէ, բայց փորձեք որքան հնարավոր է շուտ խորհրդակցել բժշկի հետ, եթե. 

• այտուցը ժամանակի ընթացքում չի անցնում 

• ունեք սրտի, լյարդի կամ երիկամների հիվանդություն 

• այտուցը կարմրած է և տաք 

• այտուցը ուղեկցվում է ջերմությամբ 

• դուք հղի եք 

Ինչ է այտուցը 

Այտուցն առաջանում է այն ժամանակ, երբ հեղուկը հավաքվում է մարմնի հյուսվածքներում: Շատ հաճախ դա տեղի է ունենում ոտքերի հատվածում. հեղուկը կուտակվում է կոճերի, թաթերի մասում: Բայց այտուցը հաճախ կարող է առաջանալ նաև մարմնի այլ հատվածներում` ձեռքեր, որովայն, դեմք: 

Ինչու է առաջանում այտուց 

Ամենատարածված պատճառներն են. 

1. Դուք վիրավորվել եք կամ այրվածք ստացել 

Խորը քերծվածք, մեղվի խայթոց, ոլորված կոճ, այրվածք` մաշկի ներքին շերտերի վրա ազդած ցանկացած վնասվածք մեր օրգանիզմն ընկալում է որպես վտանգ և դրան արձագանքում այտուցով: 

2. Դուք չափազանց շատ կամ չափազանց քիչ քանակությամբ հեղուկ եք օգտագործում 

Առաջին դեպքում երիկամները ժամանակ չունեն մարմնից ավելցուկային հեղուկը հեռացնելու, արյան պլազմայում մեծ քանակությամբ ջուր է կուտակվում, այն սեղմում է արյան անոթների պատերը: Երկրորդ դեպքում, երբ հեղուկի խիստ պակաս կա, մարմինը սկսում է իր պաշարները պատրաստել միջբջջային տարածքում: Հետևաբար, այտուցը հաճախ հայտնվում է շատ շոգ օրերին: Դա ազդանշան է, որ դուք ջրազրկվում եք։ 

3. Դուք չարաշահում եք աղի օգտագործումը 

Աղի պատճառով հյուսվածքներում ջուրը կուտակվում է: Արդյունքում՝ աղի ձկան կամ թթու վարունգի չարաշահումն արտահայտվում է այտուցով: 

4. Օգտագործում եք սպիտակուցի ցածր պաշար ունեցող մթերքներ 

Եթե օրգանիզմը սպիտակուցների պակաս ունի, նրա հյուսվածքները, ներառյալ արյան անոթների պատերը, դառնում են նվազ առաձգական, և խոնավությունն հեշտությամբ ներթափանցում է միջբջջային տարածք: 

5. Դուք չափազանց երկար եք գտնվել մեկ դիրքում 

Այս դեպքում առկա է արյան շրջանառության լճացման և այտուցների կապ: Այտուցի այս տեսակն առավել հաճախ ազդում է ոտքերի վրա, օրինակ, եթե դուք չափազանց երկար եք կանգնած կամ նստած մնում, կամ կարող է ազդել ձեռքերի վրա, եթե դրանք երկար ժամանակ գտնվել են անհարմար դիրքում: 

6. Դուք կին եք և ունեք դաշտան 

Նախադաշտանային համախտանիշի հորմոնալ տատանումները հաճախ ուղեկցվում են հյուսվածքներում հեղուկի կուտակմամբ և պահմամբ: 

7. Դուք հղի եք 

Ինչպես նախորդ դեպքում, պատճառը հորմոնալ տատանումներն են: Հորմոնալ խանգարման այլ օրինակներ են՝ եթե մոտենում եք դաշտանադադարին կամ ընդունում եք հակաբեղմնավորիչներ: 

8. Դուք որոշակի դեղամիջոցներ եք ընդունում 

Այտուցը կարող է լինել դեղերի կողմնակի ազդեցություն. 

• Հանրաճանաչ ցավազրկողներ, ինչպիսիք են՝ ibuprofen-ը կամ naproxen-ը 

• դեղամիջոցներ՝ արյան բարձր ճնշման համար 

• շաքարախտի համար օգտագործվող որոշ դեղեր 

• ստերոիդներ: 

9. Դուք ալերգիկ եք 

Ի պատասխան մարմնի մեջ ներթափանցած ալերգենի՝ անոթները, որոնք գտնվում են նրա ամենամեծ կոնցենտրացիայի  մոտակայքում, հեղուկ են արձակում հյուսվածքի մեջ՝ արագ վնասազերծելու և վտանգը վերացնելու նպատակով: 

10. Դուք ունեք լուրջ հիվանդություն` կապված ներքին օրգանների աշխատանքի հետ 

Այս իրավիճակը կարելի է ենթադրել, եթե այտուցը դառնում է քրոնիկ: Կան մի քանի հիվանդություններ և խանգարումներ, որոնք առաջացնում են հյուսվածքների ավելորդ խոնավության կուտակում: 

• Սրտի քրոնիկ անբավարարություն  

• Երիկամային հիվանդություն 

• Հեպատիտ և ցիռոզ 

• Քրոնիկ երակային անբավարարություն 

• Լիմֆոստազ 

Ինչպես հեռացնել այտուցը

Դա կախված է նրանից, թե կոնկրետ ինչ հետևանքով է այն առաջացել: Օրինակ՝ ձեզ խայթել է մեղուն, քերծվածք  եք ստացել կամ ինչ-որ երեկույթի ժամանակ չափից շատ եք հեղուկ օգտագործել, ապա պետք չէ անհանգստանալ. հիմնականում մարմինն ինքնուրույն է հաղթահարում նման այտուցը: Եթե ոտքերը, ձեռքերը, դեմքը պարբերաբար այտուցվում են, և չգիտեք, թե կոնկրետ ինչն է պատճառը, մի՛ հապաղեք այցելել թերապևտի: Բժիշկը կախտորոշի ձեզ և  կպարզի խանգարումները, որոնք վտանգավոր են առողջության և կյանքի համար: