Ձկան օգտակարությունը բարձրացնում են նրանում պարունակվող անփոխարինելի ամինաթթուները (տրիպտոֆան, լիզին, մեթիոնին) և ճարպալույծ վիտամինները: Ի տարբերություն մսի՝ ձուկն ավելի թեթև սննդամթերք է և ավելի արագ է մարսվում (ձկան սպիտակուցները յուրացվում են 93-98 %-ով, իսկ մսի սպիտակուցները՝ 87-89%-ով): Ձկան յուղայնությունը տատանվում է 2-ից 12 %-ի սահմաններում:

Ձկան ճարպը պարունակում է նաև կիսաչհագեցած ճարպաթթուներ, ինչպես նաև վիտամիններ և հանքանյութեր՝ А, D, ֆոսֆոր, կալիում և կալցիում: Յոդի, ֆտորի և բրոմի պարունակությունը ձկան մեջ 10 անգամ ավելի շատ է, քան մսի մեջ:

Եթե չկա ձկան նկատմամբ ալերգիայի հակում, ապա կարող եք շաբաթվա ընթացքում 1-2 անգամ միսը փոխարինել ձկնեղենով (նույն չափաբաժնով՝ օրը160-200 գր.): Ծովակաղամբը կամ լամինարիան յոդի աղբյուր է, ինչպես նաև մի շարք հանքանյութերի (հատկապես ֆոսֆորի, երկաթի և պղնձի), վիտամինների (A, D, B և B12): Այս ամենը ծովակաղամբին հաղորդում են հատկություններ, որոնց շնորհիվ կարգավորվում է արյան մակարդելիությունը, ինչը կարևոր է այն հղի կանանց համար, ովքեր տառապում են նորման գերազանցող մակարդելիությամբ: Այնպես որ, հղիության ընթացքում ծովակաղամբը թրոմբային բարդությունների կանխարգելման և ընկերքում արյան շրջանառության բարելավման հրաշալի միջոց է: